யாழ் மக்களுக்கு இணையம் மூலமான நிதி மோசடி தொடர்பில் வெளியான எச்சரிக்கை!

 

யாழ்ப்பாணத்தில் அண்மைக்காலமாக இணைய மூலமாக நிதி மோசடிகள் அதிகரித்து வருவதாகவும், இதன் மூலம் ஏராளமான மக்கள் பாதிக்கப்பட்டுள்ளதாக பொலிஸாரால் தெரிவிக்கப்படுகிறது. 

இத்தகைய நிதி மோசடிகள் ஊர்காவற்துறை பகுதியில் மட்டுமே அதிகரித்துள்ளதாகவும், இப்போது ஊர்காவற்துறை நீதிமன்றத்தில் இந்த மோசடி தொடர்பான வழக்குகள் நடைபெற்று வருவதாகவும் கூறப்பட்டுள்ளது.

இந்நிலையில், பொதுமக்களை சிக்கலுக்குள் இழுக்க, ஒரு நிகழ்நிலை செயலி (online app) பகிரப்பட்டு, அதில் முதலீடு செய்யுமாறு ஊக்குவிக்கப்படுகிறது. தொடக்கத்தில் சிறிய தொகை முதலீடு செய்து கொடுப்பனவு பெறுவதன் மூலம், மக்கள் முதல் வருமானத்தை நம்பி அடுத்ததாக பெரிய தொகையை முதலீடு செய்யும்போது, அந்த பணம் மோசடியாளர்களால் அபகரிக்கப்படுகின்றது.

மேலும், வங்கி கணக்கில் பணம் வைப்பதற்கான தகவல்களைப் பெறுவதற்காக, வங்கி கணக்கு இலக்கங்கள் மற்றும் அடையாள அட்டை இலக்கங்கள் என்பன மோசடியாளர்களால் மோசமாகப் பெறப்படுகின்றன. பின்னர், கைபேசியில் அனுப்பப்படும் இரகசிய இலக்கத்தை பெற்று, வங்கிக் கணக்கிலிருந்து பணம் திருடப்படுகிறது.

இவை போன்ற சம்பவங்கள் சமீபத்தில் யாழ்ப்பாணத்தில் அதிகரித்து காணப்படுகின்றன. இதனால், ஊர்காவற்துறை நீதிமன்ற நீதிவான், ஊர்காவற்துறை பொலிஸாருக்கு விழிப்புணர்வுகளை ஏற்படுத்துமாறு அறிவுறுத்தியுள்ளார். 

எனவே, மக்கள் அனைவரும் இதனால் ஏற்படும் மோசடிகளிலிருந்து பாதுகாப்பாக இருக்க விழிப்புடன் இருக்க வேண்டும் என அதிகாரிகள் அறிவுறுத்துகின்றனர்.