எரிபொருள் விலைக் குறைப்பு தொடர்பில் வெளியான மகிழ்ச்சி தகவல்

 

மாதாந்திர எரிபொருள் விலையில் இன்று (31) திருத்தம் மேற்கொள்ளப்பட்டுள்ளது. இதன்படி, பெட்ரோல் விலை குறைக்கப்பட்டுள்ளதுடன், ஏனைய எரிபொருட்களின் விலைகளில் எவ்வித மாற்றமும் மேற்கொள்ளப்படவில்லை என இலங்கை பெட்ரோலிய கூட்டுத்தாபனம் தெரிவித்துள்ளது.

இன்று (31) நள்ளிரவு முதல் நடைமுறைக்கு வரும் வகையில், இலங்கை பெட்ரோலியக் கூட்டுத்தாபனம் எரிபொருள் விலைகளை குறைத்துள்ளது. ஒக்டேன் 92 பெட்ரோல் லீட்டர் ஒன்றின் விலை 10 ரூபாவினால் குறைக்கப்பட்டு, அதன் புதிய விலை 299 ரூபாவாக நிர்ணயிக்கப்பட்டுள்ளது. 

அதேபோல், ஒக்டேன் 95 பெட்ரோல் லீட்டர் 10 ரூபாவினால் குறைக்கப்பட்டு, அதன் புதிய விலை 361 ரூபாவாக மாற்றப்பட்டுள்ளது.

இலங்கை பெட்ரோலியக் கூட்டுத்தாபனம் கடந்த மாதம் எரிபொருள் விலைகளை திருத்தவில்லை. அதன்படி, 92 ரக பெட்ரோல் 309.00 ரூபாவுக்கும், 95 ரக பெட்ரோல் 371.00 ரூபாவுக்கும் விற்பனை செய்யப்பட்டது. இம்மாத திருத்தத்தில் இவை 10 ரூபாவால் குறைக்கப்பட்டுள்ளன.

எனினும், ஏனைய எரிபொருட்களின் விலைகள் எந்த மாற்றமும் இல்லாமல் அதே விலையில் விற்பனை செய்யப்படுகின்றன. அதாவது, லங்கா வெள்ளை டீசல் 286.00 ரூபாவுக்கும், சூப்பர் டீசல் 331.00 ரூபாவுக்கும், மண்ணெண்ணெய் 183 ரூபாவுக்கும் விற்பனை செய்யப்படும் என கூட்டுத்தாபனம் அறிவித்துள்ளது.